Reklam
Xəbər lenti













































Ən çox oxunanlar

“Mən qorxaq adam deyiləm, qorxsaydım, çoxdan kənara çəkilərdim” - deputat

âMÉn qorxaq adam deyilÉm,  qorxsaydım, çoxdan kÉnara çÉkilÉrdimâ
Yeni Azərbaycan Partiyası (YAP) icra katibinin müavini, İctimai birliklər və dini qurumlar komitəsinin sədri Siyavuş Novruzov “Yeni Müsavat”a geniş müsahibə verib. Hakim partiyanın funksioneri gündəmdəki bir sıra aktual məsələlərdən, o cümlədən facebook sosial şəbəkəsinə gəlişindən danışdı, ilginc fikirlər söylədi.

- Siyavuş bəy, Məhərrəmlik ərəfəsində danışırıq. Milli Məclisin İctimai birliklər və dini qurumlar komitəsinin sədri olaraq Məhərrəmliklə bağlı nə kimi tövsiyələriniz var?

- Biz Dini Komitə və Qafqaz Müsəlmanları İdarəsi ilə birlikdə yerlərdə görüşlər keçiririk. Görüşlər əsasən ona həsr olunub ki, Məhərrəmlik ayı qan tökülən ay deyil. Ümumiyyətlə, bu ayda qan tökmək olmaz! Vaxtilə səhv ediblər, Məhərrəm ayında İmamızı qətlə yetiriblər. Ona görə də İslam tarixində bu ay ən müqəddəs aylardan biri hesab olunur. Biz insanlara düzgün istiqamətdə hərəkət etməyi tövsiyə edirik. Məsələn, qanvermə aksiyası keçirmək olar. YAP özü də sentyabrın 6-da qanvermə aksiyası keçirəcək. Bundan əlavə, aztəminatlı ailələrə, ehtiyacı olan insanlara ehsanlar verilə bilər. Özünü döymək, zəncir vurmaq, baş yarmaq İslama zidd hərəkətlərdir.

- Matəm ayının iki ay davam etməsi ilə bağlı bəzən fərqli fikirlər səslənir. Müasir dövrdə ayrı-ayrı mərasimlərin keçirilməsi ilə əlaqədar olaraq dini komitənin təklifləri ola bilərmi?

- Yox, indi bu, bir ənənədir də. 40 gün yasdır, 10 gün əvvəl, 10 gün də Səfər ayı olduğu üçün matəm saxlanılır. Azərbaycanda qədimdən indiyədək bu ənənə formalaşıb ki, bu vaxtda toy, nişan, digər mərasimlər həyata keçirmək olmaz. Bu ənənə artıq insanların düşüncəsində formalaşıb. Sonra pis bir hadisə baş verər, kimsə düşünər ki, mən Məhərrəmlikdə toy elədim, ona görə oldu. Ancaq ümumilikdə Peyğəmbərimizə cəmi 3 gün yas saxlanılıb. Heç kəs Peyğəmbərdən artıq deyil.

-Uşaq pulunun bərpası ilə bağlı qərar veriləcəyi barədə mətbuatda açıqlamanızı oxudum. Deməli, bununla bağlı payız sessiyasında qərar veriləcək?

- Hazırda müzakirə aparırıq, xarici ölkələrin təcrübəsini öyrənirik. Bu, dünyada, həmçinin postsovet məkanında necədir və sair...Tutaq ki, hər uşağa 30 manat pul verirsən, əslində bunu verməsən, daha yaxşı olar. Elə bir variant seçməliyik ki, valideynin üstündən yük götürülsün. Məsələn, uşağın məktəb ləvazimatı, digər məsələləri, qidalanması var, gərək pul ona çatsın. Həm də elə olmalıdır ki, dövlətin bu vəsaiti ayırmağa gücü çatsın. Hər şey qaydalar çərçivəsində olmalıdır.

- Uşaq pulu hansı yaşda uşaqları əhatə edəcək, bununla bağlı ortaq məxrəcə gəlinibmi?

- Hələlik müzakirələr gedir. Özü də çox ciddi şəkildə...

- Son zamanlar iş adamı olan deputatlardan çox yazılır, sərvətləri açıqlanır. Hesab olunur ki, növbəti çağırışda artıq onları parlamentdə görməyəcəyik. Hakim partiyanın rəhbər şəxsi olaraq bu barədə nə deyə bilərsiniz?

- Bilirsiniz, burada fərdi yanaşma olmalıdır. Məsələn, insan var ki, vaxtilə biznes sahəsində işləyib, iş qurub, sonra gəlib seçilib, indi bunun günahı nədir? O şəxs parlament səlahiyyətlərindən istifadə edib biznesini qurmayıb ki... Bizdə məsələyə ümumi yanaşma tərzi düz deyil. Əgər bu adam deputat səlahiyyətlərindən istifadə edib belə bir iş görürsə, təbii ki, qanunsuzdur. Amma deputat olana qədər bu addımları atıbsa, bu, başqa məsələdir. Götürək elə Amerika nümunəsini, öz biznesini yaradanlar sonradan hər bir yerə seçilirdilər. Kimsə onlara bir söz deyirdi? Yox.

- Maraqlıdır, imkanlı deputatların hakim partiyaya maliyyə dəstəyi olurmu?

- Xeyr. Hakim partiya ancaq üzvlük haqları ilə, bir də dövlət büdcəsindən ayrılan vəsait hesabına öz işini qurur. Biz heç vaxt ianə toplamırıq.

- Bu günə qədər olan məlumata görə, növbəti parlament seçkiləri 2020-ci ildə keçiriləcək. Yeni tərkib barədə partiyada fikirlər varmı?

- Təhlillər aparılır. Bu məsələlər hamısı bir-bir araşdırılır. Özü də bir günü yox, beş illik müddəti araşdırırıq. Parlamentdəki fəaliyyət, beynəlxalq təşkilatlardakı fəaliyyət, seçicilərlə gördüyü iş, çıxışlar, davranış və sairin təhlili gedir.

- Hakim partiyanın üzvü olan 68 deputatın neçəsi növbəti tərkibdə yer ala biləcək, bu, təxmini də olsa, məlumdurmu?

- Yenə deyirəm, təhlillər gedir. Həm də qərarı mən vermirəm, partiyanın sədri verir.

- Siyavuş bəy, facebook sosial şəbəkəsinə gəlişiniz maraqla qarşılandı, müzakirələrə səbəb oldu. Bu gəliş hansı zərurətdən irəli gəldi?

- Zərurət ondan ibarətdir ki... Məsələn, bir neçə qəzeti çıxmaq şərtilə... İndi siz peşəkarsınız, neçə illərdir biz danışırıq, yazırıq, olan şeylər düzgün çatdırılır. Amma elə jurnalist var ki, sən dediyin fikir qalır kənarda, özünə sərf eləyəni götürüb çapa verir. Yaxud müəyyən bir fikri ortadan çıxarır, dərc edir. Yəni əvvəl axırla üst-üstə düşmür. Bu mənada insanlara özün öz fikrini çatdıranda daha yaxşı olur.

- Deməli, siz vətəndaşlarla birbaşa ünsiyyətdə olmaq istədiniz, eləmi?

- Bəli.

- Dostluğunuzda neçə nəfər var?

- İndi gəlirlər də yavaş-yavaş.

- Maraqlıdır, sizin dostluğunuzda müxalifət liderləri, məsələn, İsa Qəmbər, Əli Kərimli, digərləri ola bilərmi?

- Bilmirəm. Hələ təzə başlamışıq. Qoy siftə eləyək, görək necə olur. (Gülür)

- Bəs siz onlarla dostluğu mümkün sayırsınızmı?

- O baxır vəziyyətə.

- Sosial şəbəkələrdə bir sıra hallarda sərt polemikalar, həmçinin əndazəni keçən şərhlər olur. Belələri ilə rastlaşırsınız?

- Söyüş yazan, başqasının adı altında təhqir edən var. Mən elə şeylərə əhəmiyyət vermirəm. Düz adam yazar, adın, familiyasını qeyd edər, telefon nömrəsini qoyar. Filmdə deyildiyi kimi, yazırsansa, yaz, altından da imzanı qoy! (Gülür) Yoxsa başqa məsələlər əhəmiyyətsiz şeylərdir. Mənim gizlində oyun oynamaqla heç vaxt aram olmayıb, bundan sonra da olmayacaq.

- Bəs sizə qarşı həqarət edənləri dostluğunuzda saxlayacaqsınız?

- Yox! Elə adamla dost olmaq olar?

- Son günlər Sorosla bağlı yeni məlumatlar yayılmaqdadır. Dünya ölkələrini vaxtaşırı çalxalayan bu təşkilatla bağlı Azərbaycanda narahatlıq varmı?

- Yox. Azərbaycanda belə bir şey yoxdur. Azərbaycanda xalqla iqtidar bir yerdədir. Cənab prezidentin apardığı siyasət əhali tərəfindən dəstəklənir. Sosial sahə, digər sahələrlə bağlı, pensiyaların, əmək haqlarının artırılması, insanların güzəranının yaxşılaşdırılması ilə əlaqədar olaraq vaxtaşırı sərəncamlar verilir. Azərbaycan artıq postsovet məkanında pensiya, orta aylıq əmək haqqına və minimum əmək haqqına görə birinci yerdə gedir. Ona görə də Azərbaycan bütün sahələrdə, istər sənaye, istər kənd təsərrüfatı sahəsində inkişaf etməkdədir. Təbii ki, bizi gözü götürməyən qüvvələr nəsə etməyə çalışırlar. Amma Azərbaycanda güclü, oturuşmuş dövlət var, tam şəkildə bütün məsələlərə nəzarət edilir. 

- Siyavuş bəy, bugünlərdə Türkiyədə YAP - Yaşam və Ədalət Partiyası yaradıldı. Bu xəbəri necə qarşıladınız?

- Onlar yaradıb. Amma bizimki başqa YAP-dır, onlarınkı başqa. 

- Son zamanlar “KQB” arxivlərinin açılması ilə bağlı təkliflər yenidən eşidilir. Hakim partiyanın bununla bağlı mövqeyi necədir?

- Mən hesab edirəm ki, o məsələlər yersizdir. Vaxtilə olub da. İndi də bu proses gedir. Hər bir adam dövlətinə xidmət etməlidir də. Dövlətə xidmət edən adamlardan ola bilər ki, kiminsə adı oradadır. Bu şeylər mənasızdır, arxivlər açılsın, nə bilim nə... Arxiv açılsa, çox adamın başına çox iş gələcək.

- Belə iddialar da var ki, Azərbaycanın yüzlərlə vətəndaşı Rusiyadan maaş alır...

- Təbii ki, bu, indi də var, gələcəkdə də olacaq. Sonrakı dövrlərdə də baş verəcək. Təkcə Rusiyadan yox, digər ətraf ölkələrdə var. Bunlar hamısı olan işdir. Onlar nələrsə etməyə çalışırlar. Bizimkilər də çalışır ki, bunun qarşısını alsın.

-Siyavuş bəy, facebook statusunuzdan oxudum ki, sizin ünvanınıza həqarətli fikirlər yazanlara da xitab etmisiniz...

- Yenə də söyüşü davam etdidirlər. Bu, bisavad adamların işidir də. Söyüm, qurtarsın getsin. Məni söyməklə sakitləşəcəksənsə, onda söy! Amma beləsinə demək istəyirəm ki, bu yollarla məni qıcıqlandıra bilməzsən, yolumdan döndərə bilməzsən!

- Təhqirlər sizi facebooka uzaqlaşdıra bilərmi?

- Qəti şəkildə! Mən qorxaq adam deyiləm. Mən iki müharibə veteranıyam. Qorxsaydım, çoxdan kənara çəkilərdim. Mən Heydər Əliyevin yanında böyümüşəm, onun tərbiyəsini almışam, yanında inkişaf eləmişəm. Yəni elə şeylər məni qorxuda bilməz. Özü də bir olan Allaha and içirəm, bunları kimin yazdığını da bilirəm.

- Yəni başqa adlar altında yazırlar?

- Bəli.

- Sizin facebook gəlişinizdən sonra müxalif fikirli bəzi şəxslər yazdılar ki, vaxtilə Siyavuş Novruzov sosial şəbəkədə avaraların yığışdığını deyirdi, indi özü bura gəldi...

- Mən elə söz ömründə deməmişəm. Mən yuxarıda da gəlişimin məqsədini söylədim. Müəyyən məsələlərlə bağlı mənə müraciət olunur və mən də birbaşa cavablandırdım. Virtual ünsiyyətdən söhbət gedir. Birinə müsahibə verirsən, götürür yarısını kəsib tullayır, yarısını təhrif edir. Mən parlamentdə çıxış edirəm, sonra bəzi mətbuat orqanlarını oxuyanda deyirəm ki, axı mən belə çıxış eləməmişəm, bu, nə yazıb? (Gülür) Hər şey düz olmalıdır. Düz bütün əyriləri kəsir. 

- Bəzi deputat həmkarlarınız hələ də facebook qəbul etmək istəmir. Siz sosial şəbəkələrdən uzaq dayanan deputatların da burada olmasını istərdinizmi?

- Kimin batıq yeri yoxdursa, üzr istəyirəm, çıxsın xalqın qarşısına cavab versin. Əsas məsələ budur. Batıq yerin yoxdursa, çıx camaatın qabağına!

- Bəziləri nədənsə görünməməyə üstünlük verir. Çalışır ki, nə kiməsə danışsın, nə də kimsə ondan bəhs eləsin. Mən iki məsələyə heç vaxt qarışmamışam: ailə-uşaq məsələlərinə, bir də başqasının seçiminə.

- Gələcəkdə Youtube kanalı açmaq, canlı yayıma çıxmaq planınız yoxdur ki?

- Youtube-də YAP-ın kanalı var da. Yutub-a mən nəyə çıxım, artist deyiləm ki. (Gülür) Fikirlərimi camaatla bölüşürəm də.

- Siyavuş bəy, dini komitənin sədri olaraq QMİ-nin sədri Şeyxülislam Hacı Allahşükür Paşazadəni təbrik etdinizmi?

- Bəli, Şeyxlə danışdım, özü də ilk təbrik edənlərdən biri mən oldum. Doğrudan Şeyx böyük insandır, çox böyük işlər görür. Mən dəfələrlə onunla xarici səfərlərdə olmuşam. Sizə bir şeyi deyim, onun xristian dünyasında hörməti müsəlman dünyasından daha artıqdır.

- Şeyxə yubiley hədiyyəniz nə oldu?

- Təbrik elədim. Şeyxə nə hədiyyə etmək olar ki? O, Şeyxdir... (Gülür) 



           Tarix: 30-08-2019 10:33   

Gündəm
































Video səhifəmiz

Bakıda avtobuslar Éks yola çıxaraq sÉrniÅinlÉri tÉhlükÉyÉ atıb

Fotosesiya